Бала күтімі жәрдемақысы 3 жасқа дейін ұзартылуы мүмкін.
Елімізде бала күтіміне байланысты төленетін жәрдемақы мерзімі ұзартылуы мүмкін. Бұл туралы Премьер-министрдің орынбасары Қырымбек Көшербаев мәлімдеді.
– Декреттік демалыстағы аналарға жәрдемақыны 1,5 жылдан ұзақ төлеу мәселесі жиі көтеріледі. Мен тіпті 3 жылға дейін төлеуге қарсы емеспін. Ақша болса, әрине, төлейміз. Бірақ басты мәселе – қаражаттың қайдан табылатынында, – деді вице-премьер.
Сонымен қатар ол жәрдемақы көлемін азайту туралы қауесеттерге қатысты пікір білдіріп, мұндай шешім қабылданбағанын айтты.
– Мен жәрдемақы қысқарады дегенді естіген жоқпын. Ал оның көлемін ұлғайту үшін барлық бағдарламаларға ревизия жүргізіліп, тиімсіз жобалар оңтайландырылуы керек. Қазір осы бағытта нақты жұмыстар атқарылып жатыр, – деді Қырымбек Көшербаев.