Қайрат Садықов Қорғаныс министрінің орынбасары – Әуе қорғанысы күштерінің бас қолбасшысы болып тағайындалды
Президент Қасым-Жомарт Тоқаевтың өкімімен генерал-майор Қайрат Әнуарбекұлы Садықов Қазақстан Республикасы Қорғаныс министрінің орынбасары – Қарулы Күштері Әуе қорғанысы күштерінің бас қолбасшысы лауазымына тағайындалды. Бұл туралы Ақорданың ресми сайтында хабарланды.
Қайрат Садықов 1967 жылғы 14 сәуірде Шығыс Қазақстан облысы, Зайсан ауылында дүниеге келген. Орынбор жоғары әскери авиациялық училищесін, Қазақстан Республикасының Ұлттық қорғаныс университетін және Д.А. Қонаев атындағы университетті тәмамдаған. Философия ғылымдарының кандидаты.
Ол Әуе қорғанысы күштерінде әртүрлі басшылық лауазымдарда қызмет атқарған. 2023 жылдан бері Әуе қорғанысы күштері бас қолбасшысы басқармасы бастығының бірінші орынбасары – штаб бастығы қызметін атқарып келді.
Генерал-майор Садықов «Айбын» II дәрежелі орденімен, «Жауынгерлік ерлігі үшін» медалімен және басқа да марапаттармен наградталған. Қазақ және орыс тілдерін еркін меңгерген. Отбасылы, балалары бар.
Еске сала кетейік, 2024 жылғы 8 маусымда Мемлекет басшысының жарлығымен Руслан Жақсылықов Қорғаныс министрі қызметінен босатылған болатын.