Парламент палаталарының бірлескен отырысында Мәжіліс төрағасы Ерлан Қошанов некеге тұруға мәжбүрлеу ісі үшін қылмыстық жауаптылық енгізілгенін мәлімдеді.
— Соңғы уақытта ұлттық дәстүр деген желеумен, мәжбүрлі түрде қыз алып қашу оқиғалары жиілеп кетті. Негізінде, бұл — адам құқығы мен еркіндігін өрескел бұзу. Мұндай әрекетті Мемлекет басшысы Ұлттық құрылтайда «мүлдем ақтауға болмайтын заңсыздық, қараңғылық, тіпті масқара тірлік» деп бағалағаны бекер емес, — деді Қошанов.
Оның айтуынша, қазіргі қолданыстағы заңнамада бұл мәселе нақты қарастырылмағандықтан, мұндай істердің өте аз бөлігі ғана сотқа дейін жетеді.
— Осыған байланысты депутаттар некеге тұруға мәжбүрлеу ісін қылмыстық жауаптылыққа жатқызатын жаңа норманы енгізді. Бұл өзгеріс мұндай әрекеттерге толыққанды құқықтық баға беруге мүмкіндік береді. Ең бастысы — қыздарымыз бен қарындастарымыздың абыройы мен ар-намысын қорғауға бағытталған, — деп атап өтті Мәжіліс төрағасы.
Бет-жүзді жасыратын киімге де тыйым салынды
Сондай-ақ отырыс барысында Парламент адамның бет-жүзін тануға бөгет жасайтын киім киюге тыйым салатын норманы да қабылдады. Бұл норма қоғамдық қауіпсіздік пен тұлғаны тану процесін қамтамасыз ету мақсатында енгізілді.