Астана қаласының прокуратурасы саябақтарда, ойын-сауық орталықтарында, қоғамдық көліктер мен көшелерде рейд жүргізу барысында жасөспірімдерді заңсыз әрекеттерге тарту жағдайын анықтады.
Рейд нәтижесінде:
-
2008–2010 жылдары туған 8 кәмелетке толмаған жасөспірім анықталды;
-
Олар үш қайырымдылық қоры тарапынан ешқандай еңбек шартысыз волонтер ретінде жұмысқа тартылған;
-
Аталған қорлар ӘҚБтК-нің 86-бабының 3-бөлігін бұзған.
Прокуратураның мәліметінше, бұл қайырымдылық ұйымдары «қайырымдылық» деген желеумен шамамен 340 млн теңге көлемінде қаржы жинаған.
Қазіргі таңда аталған факті бойынша ҚР Қылмыстық кодексінің 190-бабы 2-бөлігі 1-тармағы (алаяқтық) бойынша қылмыстық іс қозғалды.
Сонымен қатар:
«Кәмелетке толмағандарды заңсыз әрекеттерге тартқаны үшін қор басшыларына қатысты бөлек құқықтық баға беріледі. ҚР ҚК-нің 132-бабына сәйкес, кәмелетке толмағандарды құқық бұзушылыққа тарту қылмыстық жауапкершілікке әкеледі», — делінген прокуратура хабарламасында.
Еңбек заңнамасы да бұзылған:
ҚР Еңбек кодексінің 31-бабына сәйкес:
-
16 жастан бастап еңбек шарты міндетті түрде жасалуы тиіс;
-
14 жастан бастап тек заңды өкілінің келісімімен ғана еңбек шарты рәсімделеді.
Бұл талаптарды сақтамаған жұмыс берушілер ӘҚБтК-нің 86-бабы бойынша әкімшілік жауапкершілікке тартылады.
Прокуратура ескерту жасайды:
«Қайырымдылық қорлары мен ата-аналар балалардың заңсыз әрекеттерге қатысуына жол бермеуі тиіс. Олардың волонтерлік немесе өзге де іс-шараларға қатысуына мұқият назар аудару қажет», — делінген ресми хабарламада.
Еске салайық, енді қайырымдылық қорлары БАҚ-та есеп беру тәртібін сақтауға міндеттеледі. Бұған дейін Мәдениет және ақпарат министрі Аида Балаева қайырымдылық көмек көрсету механизмін жетілдіру қажеттігін атап өткен болатын.