Ішкі істер министрінің орынбасары Санжар Әділов Шерзат Полаттың өліміне қатысты істің прокуратурада жатқанын айтты. Ол істің барысына қатысты пікір білдірді.
Санжар Әділовтің айтуынша, Шерзаттың қазасына қатысты іс жақын арада сотқа түседі.
“Қазір Шерзаттың өліміне қатысты істі прокуратура зерттеп жатыр. Алдағы күндері, осы аптада іс сотқа өтеді деп күтіп отырмыз”, – дейді Ішкі істер министрінің орынбасары.
Алайда ведомство өкілі сот отырысының қашан басталатынын айта алмады.
“Бұл соттың айрықша құзіреті. Іс түскен кезде сот негізгі сот талқылауымен айналысатын судьяны анықтайды. Кейінірек бұл мәселе бойынша соттың өзі түсініктеме бергені дұрыс болады”, – деді Санжар Әділов.