Жадыра Байдалы, кәсіпкер, оқытушы:
Еңбек адамының қадірі қашанда жоғары. Бір іспен ғана айналыспай, мамандығын кәсіппен ұштастырып, елдің экономикасын көтеруде ізденіп, өзінің еңбексүйгіштігін дәлелдеп жүрген жандар аз емес.
Мәселен, Түркістан облысы Қазығұрт ауданының тұрғыны Жадыра Байдалы №11 Түркістан колледжінде «Тамақтандыруды ұйымдастыру» мамандығы бойынша дәріс беріп қана қоймай, мамандығын дамытып, бүгінде қымыздан балмұздақ пен сабын жасап, жеке кәсіппен айналысып келеді. Сұхбатымызда ол алдағы уақытта кәсібін дөңгелетіп, жұмыссыз жүрген жандарды жұмыспен қамтитындығы жөнінде айтып берді.
– Жадыра ханым, қымыздан балмұздақ пен сабын жасау кәсібін бастау идеясы қайдан келді?
– Түркістан облысы бойынша сәуір айында Worldskills Turkestan – 2023 атты облыстық колледждер арасында жарыс өткен болатын. Жарыстың мақсаты – инновациялық жоба дайындау керек. Сонымен біз әріптестер ойластыра келе, Қазығұрт ауданында қымыз, саумал көп болғаннан кейін, одан оңтүстік аймақта дамымаған, қолданысқа енбеген жаңа өнімді дайындайық деп шештік. Әрі жарыстың шарты бойынша оқу бағытына сәйкестендіре отырып, салқын десерттік тағам ретінде қымыздан, саумалдан балмұздақ дайындап, алып баруды ұйғардық. Worldskills Turkestan – 2023 жарысына Түркістан облысының әкімі қатысып, жақсы бағасын беріп, І орынды жеңіп алдық. Осылайша, балмұздақ дайындау кәсібін жалғастырып келеміз.
– Сонда балмұздақты қалай дайындадыңыздар? Балмұздақта қымыздың қасиеті жойылып кетпейді ме?
– Бұл балмұздақтың басқа балмұздақтан ерекшелігі құрамындағы сүті қайнатылмай жасалуында. Себебі биенің сүтін сауып алғаннан кейін оны жерге қоймай, дәрумендік қасиетін сақтай отырып, адамдар дәрілік, емдік мақсатта көбірек ішеді. Сол себептен біз сүттің табиғи қалпы мен дәрумендік қасиетін сақтау үшін қайнатпай жасаймыз. Ол үшін саумал мен қымызды екі бөлек ыдысқа құйып, балмұздақты қатыратын, көпіршітетін, иіс пен дәм беретін арнайы қоспаларды қосып, жақсылап араластырамыз. Одан кейін балмұздаққа арналған қалыптың бір жағына саумалды, екінші жағына қымызды құямыз. Қымыздың дәмі қышқыл болғандықтан, оған көбіне шоколад қосып жасаймыз. Ал саумалға ванильдің дәмін қосамыз. Қалыпқа құйып болған соң, 15 минут мұздатқышқа салып, қатырамыз. Содан кейін барлығын арнайы ыдысқа салып, тұтынушыларға ұсынамыз.
– 1 литр қымыздан қанша балмұздақ шығады?
– Біз балмұздақты қалыпқа құйып, көпіршітіп, қоспаларын қосып, мұздатып шығарған кезде 1 литрден 8-10 балмұздақ шықты. Оның әрқайсысын 300 теңгеден саттық. Осылайша, балмұздақ дайындауға кеткен қымыз бен саумалдың ақшасын шығара отырып, артық пайдасын да көрдік.
– Қазір кәсібіңіз қалай дамып жатыр? Тұрғындардың өнімге сұраныстары қалай?
– Кәсіпті дамыту жұмыстары жайлап қолға алынып жатыр. Тұрғындардың да балмұздақ пен сабынға деген сұранысы өте жоғары. Кәсіпті қолға алу мақсатында жоба дайындап жатырмын. Егер жоба қабылданып жатса, қымыз бен саумалдың табиғи құрамын сақтай отырып, тағы да басқа жаңа өнімдер шығарамын деген жоспарымда бар. Мемлекет жобамызды қолдап жатса, кәсібімізді ары қарай дөңгелетіп, жұмыссыз жүрген жандарды жұмыспен қамтысақ деймін.
– Әңгімеңізге рақмет! Кәсібіңіз жандана берсін!
Сұхбаттасқан Бифат Нұрмахан
https://zhasalash.kz/news/qymyzdan-zhasalgan-balmuzdaq-pen-sabynga-suranys-zhogary-25034/