Ауыл шаруашылығы министрі Айдарбек Сапаров Қазақстан Қытайға жер беріп жатыр деген қауесеттерге байланысты кезекті рет түсініктеме берді. Үкімет отырысынан кейін өткен брифингте журналистер тікелей сұрақ қойып:
«Желіде Қазақстан Қытайға кең көлемде жер береді деген ақпарат әлі де тарап жүр. Осыған қатысты нақты жауап берсеңіз», – деді.
Министрдің жауабы тым қысқа әрі нақты болды:
«Бұл – фейк. Ешқандай жер беріліп жатқан жоқ. Мұны Жер ресурстары комитеті бақылауда ұстап отыр. Жер кодексіне сай шетелдіктерге жер жалға да, меншікке де берілмейді. Өзіміздің шаруалар жұмыс істеп жатыр».
Алайда бұл мәлімдеме қоғам арасында толық сенім тудыра қоймады. Бұған дейінгі тәжірибелер, әсіресе 2016 жылғы Жер дауына байланысты болған жаппай наразылықтар, халықтың бұл тақырыпқа неге аса сезімтал қарайтынын анық көрсетті. Ол кезде де ресми органдар түрлі уәделер бергенімен, әрекеттер мен мәлімдемелер арасындағы сәйкессіздік қоғамдық күмәнді күшейткен.
Министрдің «бәрі бақылауда» деген сөзі бір жағынан сабыр шақыруға бағытталғанымен, екінші жағынан нақты ашықтық пен есептіліктің орнына жай ғана уақытша тыныштандыру құралы ретінде қабылданып отыр. Қазіргі ақпараттық заманда қоғам бос уәдені емес, айқын дерекке, ашық есепке және тәуелсіз бақылауға негізделген нақты мәліметтерді күтеді.
Жер мәселесі – жай ғана экономикалық ресурс емес, ол елдің егемендігіне, ұлттық қауіпсіздікке тікелей қатысы бар стратегиялық мәселе. Сондықтан бұл саладағы кез келген мәлімдеме тек қысқа сөйлеммен шектелмей, жан-жақты дәлелмен және нақты деректермен сүйемелденуі тиіс.