Қазақстан Ұлттық банкі жаңа құрылыстағы тұрғын үйді сатып алу тәртібіне өзгерістер енгізуді көздейтін түзетулер жобасын әзірледі. Қаулы жобасы «Ашық НҚА» порталында жарияланып, 15 шілдеге дейін қоғамдық талқылауға ұсынылған.
Негізгі өзгеріс — енді салынып жатқан тұрғын үй нысанынан үлес (пәтер) сатып алатын азаматтар төлемді тек қолма-қол ақшасыз тәсілмен жүргізуі тиіс. Яғни, мәміле тек банк немесе төлем жүйелері арқылы жүзеге асырылуы керек. Қолма-қол ақшамен есеп айырысуға тыйым салынады.
Бұл талап үлестік құрылысқа қатысатындар, қаржылық операциялар жасайтындар және төтенше жағдайлардан кейін көмек алатын азаматтардың құқықтарын қорғауға бағытталған.
Ұсынылып отырған өзгерістерге сәйкес:
-
Қолма-қол төлем жасауға тыйым салынады — тек банк арқылы аудару;
-
Құрылыс салушы рұқсат алмаған жағдайда жаңа нысандарды жарнамалай алмайды;
-
Салынып жатқан пәтерлерге алдын ала сатып алу-сату шартын жасауға тыйым салынады;
-
Рұқсат құжаттары жоқ үйлерге ипотека берілмейді;
-
Әкімдіктер құрылысқа ақша жинау процесін бақылауға алады;
-
Құрылыс мерзімін ұзарту уақыты 9 айдан 5 айға қысқарады.
Еске салайық, бұған дейін Парламент үлестік құрылыс саласын бақылауды күшейтетін заң қабылдаған болатын. Ұлттық банктің бастамасы осы заң аясындағы шаралардың жалғасы ретінде қарастырылып отыр.