Қазақстанда ана мен бала денсаулығына қатысты көрсеткіштер айтарлықтай жақсарды. Денсаулық сақтау министрлігінің мәліметінше, соңғы бес жылда елде ана өлімі 35%-ға төмендеген. Бұл туралы Денсаулық сақтау министрі Ақмарал Әлназарова Астанада өткен Орталық Азиядағы әйелдер мен жастар денсаулығына климаттық және экологиялық қауіптердің әсеріне арналған халықаралық сессияда мәлімдеді.
Министрлік деректеріне сәйкес, нәресте және перинаталдық өлім деңгейі де азайған. Мұндай нәтижелер жүйелі реформалардың жүргізілуі және медициналық көмектің заманауи стандарттарының енгізілуі арқасында мүмкін болды.
Сонымен қатар, климат өзгерісінің денсаулыққа әсері күшейіп келеді. Температураның жоғарылауы мен экологиялық факторлар инфекциялық және жүрек-қантамыр ауруларының қаупін арттырып, әйелдердің репродуктивтік денсаулығына кері ықпал етуі мүмкін.
Елімізде жүкті әйелдерді ерте бақылауға алу шаралары күшейтілген. Қазір жүкті әйелдердің 90%-дан астамы жүктіліктің алғашқы 12 аптасында есепке алынады. «Аналар саулығы» бағдарламасы аясында алғашқы медициналық-санитариялық көмек деңгейінде және өңірлік перинаталдық орталықтарда әйелдер консультацияларының жұмысы жанданды.
Бұдан бөлек, «Бір күндік клиника» жобасы жүзеге асырылуда. Бұл бастама туа біткен даму кемістіктері мен хромосомалық патологияларды ерте кезеңде анықтауға мүмкіндік береді.
Жастар арасында да алдын алу шаралары күшейтілген. Республика бойынша жастар денсаулық орталықтары жұмыс істеп, репродуктивтік және психикалық денсаулық мәселелері бойынша кеңес береді.