Алматы қаласы бойынша Қаржылық мониторинг агенттігінің департаменті прокуратураның үйлестіруімен 6 микроқаржы ұйымының басшыларына қатысты алаяқтық және заңсыз кәсіпкерлік қызмет фактілері бойынша тергеуді жалғастырып жатыр.
«Creditum», «Sofi Finance», «Hava Finance», «SF Offline», «POS Credit», «Сәлем Кредит» микроқаржы ұйымдарының заңсыз әрекеттері салдарынан 327 мыңнан астам азамат зардап шекті. Олар 30 миллиард теңге залал келтірді.
Төлемдері кешіктірілген қарыз алушылар Hava.kz, Koke.kz, Tengo.kz компаниялармен кепілдік шарттарын жасасуға мәжбүр болған. Бұл ретте, кепілгердің жауапкершілігі тек қарыз алушы қайтыс болған жағдайда ғана қарастырылған. Бұл қызмет үшін бастапқы несие сомасынан бірнеше есе асып түсетін төлем алынып, азаматтарды қарызға батырған. Нәтижесінде, қарыз алушылар несие сомасынан 3-5 есе артық ақша төлеуге мәжбүр болған”, – деп мәлімдеді Қаржылық мониторинг агенттігінің департаменті.
Микроқаржы ұйымдарының есепшоттарына 1,8 миллиард теңге көлемінде тыйым салынды, сондай-ақ 30 миллиард теңге мөлшерінде несие портфеліне шектеу қойылды.
“Микроқаржы ұйымдарды құрғандар 2 айға қамауға алынды. Оның жалпы құны 225 миллион теңге көлемінде 2 тұрғын үйі мен BMW X6, Toyota Tundra маркалы автокөліктеріне тыйым салынды”, – делінген хабарламада.