Қызылорда облысында Ы. Жақаев атындағы Қазақ күріш шаруашылығы ғылыми-зерттеу институты жаңа күріш сорты — «Сыр сұлуын» сынақтан өткізіп жатыр. Бұл сорттың басты ерекшелігі — пісіп-жетілу мерзімінің қысқалығы мен суды аз қажет ететіндігі. Сынақ нәтижелері бойынша, «Сыр сұлуы» сорты 105-110 күн ішінде толық пісіп-жетіледі және жергілікті климат пен топырақ жағдайына жақсы бейімделген.
Мамандардың айтуынша, барлық агротехникалық талаптар орындалған жағдайда бұл сорттан гектарына 80-85 центнерге дейін өнім алуға болады. Қазіргі таңда өңірде негізінен ресейлік күріш сорттары өсіріледі, ал олардың пісіп-жетілу мерзімі 120-125 күнді құрайды. Жаңа отандық сорт уақытты да, суды да үнемдеуге мүмкіндік береді.
Сонымен қатар, ғылыми-зерттеу институты топырақтағы ылғалды ұзақ сақтауға арналған венгриялық Water Retainer атты жаңа препаратты да сынақтан өткізіп жатыр. Бұл препараттың басты мақсаты — су ресурстарын тиімді пайдалану және өсімдіктердің құрғақшылыққа төзімділігін арттыру.
2025 жылы аталған препарат Алматы, Жамбыл, Қызылорда, Қарағанды, Ақмола және Жетісу облыстарындағы егістік алқаптарында тәжірибе ретінде қолданылып жатыр.