Басшылық тендерді өздері танитын компанияларға берген.
Астанада бюджеттің қыруар қаражатын ұрлаған сот сараптамалары орталығының лауазымды тұлғалары ұсталды.
Орталық басшылығымен қатар мердігер ұйымның директоры да 2 млрд теңгеден астам бюджет қаражатын жымқырғаны үшін айыпталып отыр.
Тергеу материалдарына сәйкес, 2023–2025 жылдарға арналған нашақорлық пен есірткі бизнесіне қарсы күрес жөніндегі кешенді жоспар аясында сот-сараптама органдарын материалдық-техникалық жабдықтау мақсатында республикалық бюджеттен 10,3 млрд теңге бөлінген болатын.
«Алайда 2023–2024 жылдары сот сараптамалары орталығының лауазымды тұлғалары мүдделі топпен алдын-ала келісіп, бюджет өтінімін қалыптастыру кезінде жалған коммерциялық ұсыныстар ұсыну арқылы жабдықтың құнын үш есе арттырған», — делінген ресми хабарламада.
Бұдан бөлек, орталық мемлекеттік сатып алу конкурсын жарияламаған. Басшылық тендерді өздері танитын компанияларға берген.
Қазіргі кезде құны 148 млн теңгеден асатын Алматы қаласындағы 2 жер телімі, Астана қаласындағы пәтер және BMW Х6 мен RAV 4 автокөліктеріне тыйым салынды. Сонымен қатар, банк есепшоттарындағы 1,6 миллиард теңге, 367 мың АҚШ доллары және 366 мың еуро сомасындағы компанияның ақша қаражаты бұғатталды.
Осы іс бойынша құқықтық сараптама орталығының директоры, мемлекеттік сатып алу департаментінің басшысы және жеке меншік фирма директоры қамауға алынды. Сотқа дейінгі тергеу шаралары басталды.