Сенат төрағасы Мәулен Әшімбаев бір палаталы Парламентті құру мәселесіне қатысты өз ұстанымын жариялады. Оның айтуынша, бір палаталы Парламент – еліміздің демократиялық дамуы үшін жаңа және маңызды институт болады.
«Бұл жай ғана механикалық өзгеріс емес. Біз жаңа, біртұтас бір палаталы Парламент қалыптастыру туралы айтып отырмыз. Оның өкілеттіктері біріктіріліп, депутаттарды сайлау тәртібі өзгеруі мүмкін. Тіпті депутаттар саны да қайта қаралуы ықтимал. Бұл – еліміздің саяси жүйесі аясында қалыптасатын жаңа институт болады деп ойлаймын», – деді Мәулен Әшімбаев кулуарда.
Сонымен қатар, Сенат төрағасы Парламентті қайта құру еліміздің демократиялық дамуындағы маңызды қадам деп санайды.
«Біз сенеміз, егер бұл бастама кеңінен талқыланып, жалпыұлттық референдум арқылы халық тарапынан қолдау тапса, ол Қазақстанның одан әрі демократиялық дамуы үшін аса маңызды жаңа қадамға айналады», – деді Мәулен Әшімбаев.