Қазақстанда қант диабеті мен балалар церебралды сал ауруы (БЦП) енді әлеуметтік маңызы бар аурулар қатарына кірмейді. Денсаулық сақтау министрлігі бұл диагноздар 2026 жылдың қаңтар айынан бастап тиісті тізімнен алынып тасталатынын хабарлады.
Министрліктің мәліметінше, аталған ауруларды емдеу енді тегін медициналық көмектің кепілдік берілген көлеміне (ТМККК) кірмейді. Келесі жылдан бастап мұндай диагнозы бар азаматтар міндетті әлеуметтік медициналық сақтандыру (МӘМС) жүйесіне қатысқан жағдайда ғана дәрігердің қабылдауына тегін бара алады және тегін дәрі-дәрмек ала алады.
Өзгерістер ревматизммен және дәнекер тіннің жүйелі ауруларымен ауыратын адамдарға да қатысты. Бұл ауру түрлері де әлеуметтік маңызы бар дерттер тізімінен шығарылмақ.
Жаңа тізімде тек 11 диагноз қалады. Олардың қатарында туберкулез, ВИЧ-инфекциясы, вирустық гепатиттер, онкологиялық және басқа да ауыр аурулар бар.