Өскемен қаласындағы Лев Гумилев атындағы №38 гимназияда жаңа оқу жылынан бастап қазақ тілінде білім беретін сынып ашылады. Бұл бастама мемлекеттік тілдің мәртебесін арттырып, қазақ тілінде білім алуға деген сұраныстың өсіп келе жатқанын көрсетеді.
Биыл гимназияда 25 орындық бір қазақ сыныбы және 50 орындық екі орыс сыныбы ашылмақ. Бұған дейін негізінен орыс тілінде білім беріп келген мектептің қазақ сыныбын ашуы ата-аналар тарапынан мемлекеттік тілдегі білімге қызығушылықтың артқанын аңғартады.
Шығыс Қазақстан облысында 1-сыныпқа құжат қабылдау 10 маусым мен 31 тамыз аралығында жалғасады. Ата-аналар құжаттарды eGov.kz порталы, OQU платформасы арқылы онлайн немесе қағаз жүзінде тапсыра алады.
Қазақ сыныбының ашылуы – тек жаңа оқу орнының мүмкіндігі ғана емес, сонымен қатар өңірдегі тілдік саясаттың оң нәтижесін көрсететін маңызды қадам. Соңғы жылдары Шығыс Қазақстанда қазақ тілінде білім алуды қалайтын ата-аналар саны артып, мемлекеттік тілдегі сыныптарға сұраныс көбейген.
Көпшілік бұл жаңалықты қазақ тілінің қолданыс аясын кеңейтуге бағытталған игі бастама ретінде бағалап отыр. Өйткені мемлекеттік тілдің болашағы – сапалы білім мен жаңа буынның тәрбиесіне тікелей байланысты.