Қазақстанда Нұрлан Сабыровқа қатысты қылмыстық іс қозғалмағаны ресми түрде мәлім болды. Ішкі істер министрлігінің өкілдері бұл мәселеге қатысты түсініктеме беріп, аталған тұлғаға байланысты ішкі істер органдарында ешқандай қылмыстық іс тіркелмегенін хабарлады.
Бұған дейін әлеуметтік желілер мен бірқатар ақпарат көздерінде Сабыровтың Украинадағы соғысқа қатысып жатқан Ресейдің «Вагнер» жеке әскери компаниясының жауынгерлеріне 10 мотоцикл сыйлап, «Барлығы жеңіс үшін» қорына 2 миллион рубль аударғаны туралы мәлімет тараған болатын. Кейін Қазақстан Республикасының Ұлттық қауіпсіздік комитеті осы ақпаратқа байланысты тексеру жүргізіп жатқаны белгілі болды.
Сондай-ақ ресейлік БАҚ-та Сабыровқа Ресей аумағына 50 жылға кіруге тыйым салынғаны жөнінде ақпарат жарияланған еді. Артынша оның Ресей азаматтығын алудан бас тартқаны хабарланды. Кейіннен әзілкештің Ресейге қайта оралуына қатысты шарттар да жария болды.