Қазақстан бюджет тапшылығын жабу үшін халықаралық қаржы ұйымдарынан жалпы 1 млрд доллар көлемінде қарыз тартпақ. Мәжілісте қаралып жатқан келісімге сәйкес, ел Халықаралық қайта құру және даму банкі арқылы 92,3 млрд жапон иенін (шамамен 293 млрд теңге) алады. Бұл қаражат биылғы 4,6 трлн теңгелік бюджет тапшылығын қаржыландыруға жұмсалады.
Қаржы министрі Мәди Такиев қарыздың алдын ала жоспарланғанын айтты. Несие 11 жылға беріледі, оның алғашқы 5 жылы жеңілдік кезеңі болады. Сонымен қатар Қазақстан Азия инфрақұрылымдық инвестициялар банкі арқылы жылдық 1,2% мөлшерлемемен 400 млн доллар қарыз алады және 1,5 млрд долларлық еурооблигациялар шығаруды жоспарлап отыр.
Депутаттар қарыздың неге жапон иенімен алынатынын сұрағанда, министр бұл валютаның пайыздық мөлшерлемесі төмен әрі теңге мен иена бағамы соңғы жылдары салыстырмалы түрде тұрақты болғанын айтты. Үкіметтің есебінше, қолайсыз сценарийлердің өзінде иенамен қарыз алу тиімді болып қала береді.
Екі халықаралық банкпен жасалған келісімдердің жалпы көлемі 154,7 млрд иенді құрайды. Қаржы министрлігінің мәліметінше, Қазақстанның мемлекеттік қарызы қауіпсіз деңгейде сақталып отыр және халықаралық рейтингтік агенттіктер елдің қаржылық тұрақтылығын оң бағалайды.