Президент Қасым-Жомарт Тоқаевтың сынынан кейін Қазақстанда автомобиль жолдарын салу және олардың сапасын бақылау жүйесін реформалау қолға алынды. Премьер-министр Олжас Бектенов Үкімет жанындағы жұмыс тобына 1 желтоқсанға дейін саланы жетілдіру жөнінде нақты ұсыныстар әзірлеуді тапсырды.
Жұмыс тобы жол құрылысына қатысты қолданыстағы стандарттар мен құрылыс нормаларын қайта қарап, сапаны бағалау тетіктерін жетілдіруі тиіс. Сондай-ақ саланы басқару жүйесін жаңғырту және цифрлық технологияларды енгізу жолдары қарастырылады. Реформаның басты мақсаты – автомобиль жолдарының сапасын арттыру және бюджет қаражатының тиімді әрі ашық жұмсалуын қамтамасыз ету.
Үкіметтің хабарлауынша, жұмыс тобына жол салудың қолданыстағы жүйесін және оның сапасын бағалау тәртібін қайта қарау, сондай-ақ стандарттар мен құрылыс нормаларын жаңарту міндеттері жүктелген.
Жұмыс тобына премьер-министрдің бірінші орынбасары жетекшілік етеді. Оның құрамына жеті министрліктің өкілдері, Бас көлік прокурорының орынбасары, «ҚазАвтоЖол» және «ҚазМұнайГаз» басшылығы, сондай-ақ салалық ұйымдардың өкілдері енген. Бұдан бөлек, ұсыныстарды әзірлеуге сала сарапшылары мен Құрылтай депутаттары қатысады.
1 желтоқсанға дейін жұмыс тобы заңнамаға енгізілуі мүмкін өзгерістерді қамтитын нақты ұсыныстар әзірлеп, Үкіметке ұсынуы қажет.
Жұмыс тобы Қазақстан Халық кеңесінің алғашқы сессиясынан кейін Мемлекет басшысының тапсырмасымен құрылған.
Бұған дейін Respublica партиясының депутаты Мейірхат Қасымбаев премьер-министр Олжас Бектеновке депутаттық сауал жолдап, Қазақстанның негізгі трансшекаралық автомобиль жолдарын I техникалық санатқа дейін жеткізуді ұсынған болатын.