Қазақстанда отбасының табысы жоғары болғанымен, ол автоматты түрде ауқатты санатқа жатқызылмайды. Еңбек және халықты әлеуметтік қорғау министрлігінің мәліметінше, Отбасының цифрлық картасы әл-ауқатты бағалау кезінде 59 көрсеткішті ескереді.
Олардың қатарында отбасы мүшелерінің табысы, жылжымайтын мүлкі, автокөліктері, несиелері, бизнесі және жұмыспен қамтылуы бар.
Отбасылар әл-ауқатына қарай бес санатқа бөлінеді: A – әл-ауқаты жоғары, B – ауқатты, C – қанағаттанарлық, D – экономикалық тұрғыдан осал, E – экономикалық және әлеуметтік тұрғыдан осал.
А санатына жатқызудың бір көрсеткіші – отбасының әр мүшесіне шаққандағы айлық табыстың 350 мың теңгеден асуы. Мысалы, төрт адамнан тұратын отбасының жалпы табысы шамамен 1,4 млн теңгеден жоғары болуы керек. Алайда бұл талаптың өзі жоғары санатқа енуге кепілдік бермейді.
Бағалау кезінде тұрғын үйдің ауданы, бірнеше жылжымайтын мүліктің, коммерциялық нысандардың, бизнестің және қымбат автокөліктердің болуы да ескеріледі.
Отбасының цифрлық картасы 2023 жылғы 1 қаңтардан бастап жұмыс істейді. Қазір жүйеде шамамен 6,2 млн отбасыны құрайтын 20,6 млн азамат туралы мәлімет бар. Оның мақсаты – мемлекеттік қолдауды мұқтаж азаматтарға неғұрлым дәл бағыттау.