Қазақстан мен Грузиядағы Forbes франшизасының иесі Арманжан Байтасов экс-президент Нұрсұлтан Назарбаевтың туыстарының Forbes Kazakhstan рейтингінен алынып тасталу себептерін түсіндірді.
Оның айтуынша, рейтинг тек ашық дереккөздерге негізделеді. Егер белгілі бір тұлғаның байлығы туралы мәліметтерді растау мүмкін болмаса немесе заңды шығу тегі күмән тудырса, редакция оны тізімге қоспайды.
«Дәлелдей алмайтын ақпаратты жарияламаймыз. Өйткені мұндай жағдайда сотқа тартылу қаупі бар», – деді Байтасов.
Кәсіпкердің сөзінше, Нұрбол Назарбаев рейтингтен банкроттық туралы өтініш бергеннен кейін шығарылған. Ал Дариға Назарбаева рейтингте негізінен тұрақты болған, тек жекелеген жылдары ғана тізімнен тыс қалған.
Байтасов сондай-ақ Қазақстанда Forbes рейтингіне енуі мүмкін дәулетті адамдар көп екенін, алайда олардың байлығын ашық деректер арқылы растау әрдайым мүмкін болмайтынын айтты. Оның пікірінше, рейтингке заңды әрі ашық дәлелденген капитал ғана енгізіледі.
Айта кетейік, Арманжан Байтасовтың өзі 2026 жылғы Forbes Kazakhstan рейтингінде 150 миллион долларлық дәулетімен 60-орында тұр.