Көктемнің алғашқы айында қазақстандықтарды ұзақ демалыс күтеді. 2026 жылғы наурызда Халықаралық әйелдер күні мен Наурыз мейрамына орай айдың едәуір бөлігі демалыс күндеріне тиесілі болады.
Елімізде наурыз айында екі мемлекеттік мереке атап өтіледі: 8 наурыз – Халықаралық әйелдер күні, ал 21–23 наурыз – Наурыз мейрамы. Демалыс күндерінің ауысуына байланысты қосымша демалыстар да қарастырылған.
2026 жылдың наурызы жұмыс күндерінің саны жағынан ең «қысқа» айлардың бірі болмақ. Аптасына бес күн жұмыс істейтіндер үшін 13 демалыс күні және 18 жұмыс күні болса, ал алты күндік жұмыс аптасындағылар үшін 9 демалыс күні және 22 жұмыс күні болады.
2026 жылы 8 наурыз жексенбіге сәйкес келеді. Қолданыстағы ережеге сай, демалыс күні 9 наурызға – дүйсенбіге ауыстырылады. Осылайша, бес күндік жұмыс аптасында 7, 8 және 9 наурыз қатарынан үш күн демалыс болады, ал 10 наурыз – жұмыс күні. Алты күндік жұмыс аптасында 7 наурыз – жұмыс күні, 8 және 9 наурыз – демалыс, 10 наурыз – жұмыс күні.
Наурыз мейрамы дәстүрлі түрде 21–23 наурыз аралығында тойланады. 2026 жылы 21 наурыз – сенбі, 22 наурыз – жексенбі, 23 наурыз – дүйсенбіге сәйкес келеді. Мерекелік күндердің бір бөлігі демалыс күндеріне тап келгендіктен, қосымша демалыс күндері 24 және 25 наурызға ауыстырылады.
Осыған сәйкес, бес күндік жұмыс аптасында 21–25 наурыз аралығы бес күн қатарынан демалыс болады. Ал алты күндік жұмыс аптасында 21, 22, 23 және 24 наурыз – демалыс күндері, 25 наурыз – жұмыс күні.
Осылайша, 2026 жылғы наурыз қазақстандықтар үшін демалыс күндеріне бай ай болмақ.