Қазақстан азаматтарына қызғалдақтарды жұлу үшін 13 миллион теңгеге дейін айыппұл салынуы мүмкін. Гүлдеу маусымында көптеген туристер табиғат аясында суретке түсіп, демалысын өткізеді. Алайда мамандар бір ғана қызғалдақты жұлу да заң алдында ауыр жауапкершілікке әкелетінін ескертеді.
Орман шаруашылығы және жануарлар дүниесі комитетінің мәліметінше, Қызыл кітапқа енген сирек өсімдіктерді тек жұлуға ғана емес, оларды жинауға, тасымалдауға және сатуға да қатаң тыйым салынған.
Заңды бұзғандарға келесі шаралар қарастырылған:
- 3000 АЕК-ке дейін айыппұл (шамамен 13 миллион теңге);
- түзету жұмыстары;
- бас бостандығын шектеу;
- үш жылға дейін бас бостандығынан айыру.
Қазіргі уақытта Қызыл кітапқа енген Кауфман және Грейг қызғалдақтары табиғи ортада гүлдеп тұр. Мамандардың айтуынша, олардың гүлдеу кезеңі шамамен 2,5 аптаға созылады және бұл уақыт тозаңдану үшін аса маңызды.
«Қызыл кітапқа енген бір қызғалдақты да жұлуға болмайды», – деп атап өтті өңірлік орман шаруашылығы инспекциясының өкілдері.
Өңірлерде демалушыларға түсіндіру және бақылау жұмыстары жүргізілуде. Инспекторлар азаматтарды табиғатты қорғауға және сирек өсімдіктерді сақтауға шақырады.