Жаңаөзен қаласында мұнай саласында жұмыс істейтін компаниялардың басшылары ұсталғаны туралы ақпарат тарады. Алдын ала мәліметке сәйкес, арнайы шараларға Ұлттық қауіпсіздік комитеті мен Ішкі істер министрлігінің қызметкерлері қатысқан.
Тараған ақпаратта ұсталғандар қатарында «Jana Oil Service» ЖШС-ның (бұрынғы «Кезби») және «Өзенмұнайгаз» АҚ-ның басшылары бар екені айтылған.
Сондай-ақ мердігер ұйым өкілдері мен қылмыстық топ арасында ықтимал келісім болғаны жөнінде болжам келтірілген. Таратылған мәліметке сәйкес, кәсіпорын жұмысшыларын ереуілдер мен жаппай наразылықтарға арандату арқылы тапсырыс беруші «Өзенмұнайгаз» АҚ-дан қосымша қаражат алуға әрекет жасалуы мүмкін.
Алайда бұл ақпарат әзірге ресми түрде расталған жоқ. Уәкілетті органдар ықтимал ұстау шараларының себептері, аталған тұлғалардың іске қатысы және олардың процестік мәртебесі туралы ресми түсініктеме берген жоқ.
Осыған байланысты тараған мәліметтерді әзірге расталмаған ақпарат ретінде қарастырған жөн.