Қазақстан Президенті Қасым-Жомарт Тоқаев 28 қазанда түске дейін Қазақстан халқына дәстүрлі Жолдауын жариялайды. Бұл туралы Мемлекет басшысы өзінің X әлеуметтік желісіндегі парақшасында мәлімдеді.
«28 қазанда түске дейін жылдағы дәстүрге сай Қазақстан халқына Жолдауымды жариялаймын. Қазір осы маңызды құжаттың мәтінімен жұмыс істеп жатырмын», – деп жазды Президент.
Еске салайық, бұған дейін Қасым-Жомарт Тоқаев қазан айында Қазақстан халқына Жолдау жасайтынын хабарлаған болатын. Мемлекет басшысы бұл туралы Қырғызстанда өткен VI Дүниежүзілік көшпенділер ойындарының жеңімпаздары мен жүлдегерлерін марапаттау рәсімінде айтқан еді.