Алматыда 18 жастағы бойжеткеннің өліміне қатысты тергеу жалғасуда: анасы әділдік талап етуде
Өткен жылдың шілде айында Алматыдағы көпқабатты тұрғын үйлердің бірінде қайғылы оқиға тіркелді — 18 жастағы Ақнар Гүлстан 7-қабаттан құлап, оқиға орнында көз жұмды. Бұл жайт қоғамда үлкен резонанс тудырды. Марқұмның анасы ресми нұсқамен келіспейтінін айтып, қызының өліміне бөгде біреудің қатысы бар деп есептейді. Оның сөзінше, Ақнар өзін-өзі өлтіретін қыз емес.
Осыған байланысты Алматы қалалық Полиция департаменті ресми мәлімдеме жасады:
«Марқұмның туыстарының қайғысына шын жүректен ортақтасамыз. Тергеу жалғасуда. Соңғы процессуалдық шешім барлық қажетті сараптамалар мен тергеу әрекеттері аяқталғаннан кейін қабылданатын болады», – делінген хабарламада.
Оқиға Алмалы ауданы аумағында тіркеліп, аталған факті бойынша ҚР Қылмыстық кодексінің 105-бабы – «Өзін-өзі өлтіруге итермелеу» бойынша қылмыстық іс қозғалған. Қазіргі таңда тиісті сараптамалар жүргізіліп, тергеу амалдары жалғасып жатыр.
Алайда тергеу мүддесіне байланысты өзге мәліметтер жария етілмеген. Ақнардың туыстары бұл істің әділ тергелуін талап етіп, кінәлі тұлғалар жауапқа тартылады деген үмітте. Олар қоғамнан да қолдау сұрап, бұл оқиғаға бейжай қарамауға шақыруда.
«Ақнар — өмірге құштар, алда көптеген арманы мен мақсаты бар қыз еді. Оның өзіне қол жұмсауы мүмкін емес. Бұл — әділетсіз тұжырым. Бұл өлімнің жай ғана кездейсоқтық емес екеніне сенімдімін», – дейді марқұмның анасы.
Тергеу нәтижелері мен жаңа мәліметтер жария болған жағдайда, бұл іс қоғам назарында қала бермек.