Алматы метросы Алатау қаласына дейін ұзартылмақ

Алматы қаласында үшінші метро желісін салу жоспарланып отыр. Жаңа бағыт Алатау қаласынан басталып, Мизам базары арқылы қазіргі қолданыстағы Сайран бекетіне дейін созылады. Жобаның техникалық-экономикалық негіздемесін (ТЭН) дайындауға қатысты екі хабарландыру мемлекеттік сатып алулар сайтында жарияланды.

Құрылыс екі кезең бойынша жүзеге асады:

• Бірінші учаске: Алатау қаласынан Мизам базарына дейін;

• Екінші учаске: Мизам базарынан Сайран станциясына дейін.

Жобаның тапсырыс берушісі – Алматы қалалық мобильділік басқармасы. Метро желісін жобалау жұмыстары Алматы қаласы әкімдігінің 2025 жылғы 18 сәуірдегі қаулысына сәйкес бастау алған.

Қаржыландыру көлемі:

• Бірінші учаске бойынша жобалық құжаттама дайындауға – 1,3 миллиард теңге (1 351 054 778 теңге);

• Екінші учаске бойынша – 896 миллион теңге (896 459 961 теңге) бөлінді.

Екі жоба бойынша да ашық тендерлер 2025 жылдың 11-18 маусым аралығында өтеді, ал жұмыстарды аяқтау мерзімі – 2026 жылдың 31 мамыры.

Алатау қаласынан Мизам базарына дейінгі 7 бекет:

1. Gate City маңында, «Северный» көлік торабы аумағында;

2. «Кемел» шағын ауданы жанында;

3. Солтүстік айналма жолы мен Боралдай көшесінің қиылысында;

4. Солтүстік айналма жол мен Сауда көшесінің қиылысында;

5. Солтүстік айналма жол бойында, әскери бөлім маңында;

6. Кенжехан базарының қасында;

7. Мизам базары аумағында.

Сондай-ақ, «Северный» көлік торабының солтүстігінде орналасатын электр қоймасына желі тарту да көзделіп отыр.

Мизам базарынан Сайран станциясына дейінгі 5 бекет:

1. Солтүстік айналма жол бойында, Ялян базары аумағында;

2. «Адем» сауда үйі маңында;

3. Райымбек даңғылы мен Тілендиев көшесінің қиылысында;

4. Төле би мен Тілендиев көшелерінің қиылысында;

5. Абай даңғылы мен Тілендиев көшесінің қиылысында (бірінші желімен қиылысу нүктесі).

Жобада қарастырылған маңызды талаптар:

• Құрылыс алаңдарын анықтау;

• Жолаушылар ағынын болжау;

• Отандық құрылыс материалдарын пайдалану;

• Сәулеттік шешімдер әзірлеу;

• Қоршаған ортаны қорғау шаралары;

• Мүгедектігі бар жандарға қолжетімділік қамтамасыз ету.

Айта кетейік, 2021 жылдың қарашасында Алматы метросының бағыты «Алтын Орда» базары маңынан «Барлық» базарына дейін ұзартылатыны хабарланған болатын.