Қазақстандықтар міндетті әлеуметтік медициналық сақтандыру (МӘМС) жүйесін реттейтін заңнамаға өзгерістер енгізуді сұрап, петиция жариялады.
GosRating.com сайтында Нұрлан Тұрсынов есімді азамат МӘМС жарналарын міндетті емес, ерікті түрде төлеу қажеттігін талап еткен петициясын жариялады. Петиция авторының пікірінше, қазіргі жүйе бағаның үнемі өсуі мен инфляция жағдайында отбасыларға қосымша қаржылық салмақ түсіреді. Сонымен қатар, азаматтардың өздері пайдаланбайтын қызмет үшін төлем жасауы әділетсіз деп есептеледі. Сондай-ақ, жүйенің Конституцияға қайшы келетін тұстары бар екені де атап өтілген.
“Міндетті медициналық сақтандыру жүйесіне міндетті түрде қатысу Қазақстан Республикасының Конституциясында бекітілген таңдау еркіндігі қағидасына қайшы келеді. 14-бапта әркімнің бостандыққа құқығы бар делінген”, – делінген петиция мәтінінде.
Петиция авторы әлемнің бірқатар табысты медициналық сақтандыру жүйелерінен мысал келтірген:
“АҚШ пен Германия сияқты елдерде азаматтар сақтандыру бағдарламасына қатысу-қатыспауды өздері шешеді. Ал Қазақстандағы қазіргі жүйе көбіне тиімсіз. Денсаулық сақтау министрлігінің мәліметі бойынша, жарналардың едәуір бөлігі нақты медициналық көмекке емес, әкімшілік шығындарға жұмсалады”, – делінген петицияда.
Нұрлан Тұрсынов МӘМС туралы заңға өзгеріс енгізуді ұсынды:
“‘Міндетті әлеуметтік медициналық сақтандыру туралы’ заңды қайта қарастырып, айыппұл салынбайтын ресми бас тарту мүмкіндігімен барлық кәмелетке толған азаматтардың МӘМС-ке қатысуын ерікті ету қажет деп есептеймін. Бұл миллиондаған отбасыларға қаржыны үнемдеуге, азаматтардың өз денсаулығына жауапкершілігін арттыруға, таңдау еркіндігі қағидасына негізделген әділ жүйе құруға мүмкіндік береді”, – дейді петиция авторы.