Қазақстанға үшінші елдерден және Еуразиялық экономикалық одаққа мүше мемлекеттерден барлық көлік түрімен тауық жұмыртқасын әкелуге бір ай мерзімге тыйым енгізілді. Тиісті бұйрыққа ауыл шаруашылығы министрі қол қойды.
Ауыл шаруашылығы министрлігінің мәліметіне сәйкес, бұл шектеу отандық өндірушілерді қолдау мақсатында қабылданған.
«Айта кетейік, тыйым Қазақстан аумағы арқылы тауық жұмыртқаларын транзитпен өткізуге, сондай-ақ ЕАЭО-ға мүше бір елден екінші елге Қазақстан аумағы арқылы тасымалдауға қолданылмайды», – делінген ведомство хабарламасында.
Еске сала кетсек, бұған дейін Сауда комитетінің төрағасы әлеуметтік маңызы бар тауарлардың бағасын көтерген сатушыларды анықтағанын хабарлаған едік.