Қазақстан Президентінің баспасөз хатшысы Руслан Желдібай Халықаралық дзюдо федерациясының (IJF) жаңа технологиялар және тиімділікті арттыру жөніндегі комиссиясының директоры қызметін қоса атқарады. Бұл туралы ол өзінің Facebook парақшасында хабарлады.
«Халықаралық дзюдо федерациясының жаңа технологиялар және тиімділікті арттыру жөніндегі комиссиясының директоры қызметіне тағайындалдым. Бұл — қосымша қоғамдық жұмыс. Сенім білдіргені үшін IJF басшысы Мариус Визер мырзаға алғысымды білдіремін», — деп жазды Желдібай.
Оның айтуынша, бұл тағайындау Қазақстанның халықаралық спорт ұйымдарындағы беделін арттыруға мүмкіндік береді және өзара тәжірибе алмасуға жол ашады.
«Дзюдо саласын елімізде дамыту бойынша бірқатар жұмыс атқарылып жатыр. Дегенмен, шешімін күткен мәселелер де бар. Әсіресе, дзюдо академиясын құру және аймақтарда арнайы орталықтар ашу қажет. Сонымен қатар халықаралық ынтымақтастықты да нығайтуды көздеп отырмыз. Осы іске өз үлесімді қосуға тырысамын», — деді ол.