Қазақстанда электрондық цифрлық қолтаңба (ЭЦҚ) кілттерін қайта шығару тәртібі күшейтілді. “Ұлттық ақпараттық технологиялар” АҚ хабарлауынша, бұл өзгеріс азаматтардың жеке деректерін қорғау және алаяқтық әрекеттердің алдын алу мақсатында енгізілген.
Енді pki.gov.kz порталындағы жеке кабинет арқылы ЭЦҚ кілттерін қайта шығару кезінде пайдаланушының жеке басы міндетті түрде қосымша тексеруден өтеді. Растау екі тәсілдің бірі арқылы жүзеге асырылады:
-
SMS-код – бір реттік құпиясөз Мобильді азаматтар базасында (МАБ) тіркелген телефон нөміріне жіберіледі;
-
eGov Mobile қосымшасындағы цифрлық код – қосымшада көрсетілген кодты енгізу талап етіледі. Бұл әдіс кілттердің иесінің смартфонына қол жеткізусіз заңсыз қайта шығарылуын болдырмайды.
Аталған талаптар әзірге шетелдік азаматтарға қолданылмайды. Себебі олардың телефон нөмірлері көп жағдайда Мобильді азаматтар базасында тіркелмеген.
Бұған дейін алаяқтар түрлі айла-тәсілдер арқылы пайдаланушының жеке кабинетіне кіріп, оның ЭЦҚ кілттерін өз тасымалдағыштарына қайта шығара алған. Жаңа қорғаныс тетігі мұндай қауіптердің алдын алуға бағытталған.