Дональд Трамп Бейбітшілік кеңесінің отырысында Қасым-Жомарт Тоқаевқа алғыс айтты.
Вашингтонда өткен Бейбітшілік кеңесінің алғашқы жиынына Қазақстан Президенті Қасым-Жомарт Тоқаев қатысты. Кездесуде сөз сөйлеген Дональд Трамп Қазақстанға және оның басшысына ризашылығын білдірді. Ол Қазақстанды «бай әрі мықты мемлекет» деп атады.
Трамптың айтуынша, кеңеске қатысушы елдер Газа секторына көмек ретінде 7 миллиард доллар бөлуге уәде берген.
Жиында Қазақстан Газа аймағындағы халықаралық тұрақтандыру күштеріне әскери қызметкерлер жіберуге дайын екенін білдірді. Мұндай шешімге келіскен елдердің қатарында Индонезия, Марокко, Косово және Албания да бар.
Отырыста Қасым-Жомарт Тоқаев Дональд Трамптың атымен арнайы сыйлық тағайындауды ұсынды. Оның сөзінше, бұл марапат бейбітшілікті нығайтуға қосқан үлесін бағалау үшін берілуі мүмкін.
Кездесуге бірнеше елдің басшылары қатысты. Олардың арасында Ильхам Әлиев, Шавкат Мирзиеев, сондай-ақ Никол Пашинян мен Эди Рама болды.
Ұйымдастырушылардың мәліметінше, кеңеске 26 мемлекет мүше ретінде, тағы 23 ел бақылаушы ретінде қатысып отыр.