Бір апта бұрын Сенат ЖИ туралы заңды қайта қарау үшін Мәжіліске қайтарған еді. Сенаторлар ЖИ жүйелерін қолдану кезінде келтірілген зиян үшін міндетті сақтандыруды енгізуді ұсынды. Бұған дейін заң жобасында тек ерікті сақтандыру қарастырылған болатын.
Сонымен қатар, бұрын заңда тәуекел анықталған жағдайда залалды азайту шараларын қабылдау жеткілікті болса, енді түзетулерге сәйкес, ЖИ иелері ықтимал қауіптің алдын алу және зиянның алдын алу бойынша міндеттерді орындауы тиіс.
Бүгінгі Мәжіліс отырысында Экономикалық реформалар және өңірлік даму комитеті сенаторлар ұсынған өзгерістермен келісуге болатынын хабарлады. Депутаттар түзетулерді қолдап дауыс берді. Осылайша заң түпкілікті қабылданып, Президенттің қол қоюына жолданады.
Еске салайық, Қазақстанда заң алдымен Мәжілісте қабылданып, кейін Сенатқа жіберіледі. Сенат оны мақұлдай алады немесе кейбір нормаларына қарсылық білдіріп, құжатты қайта Мәжіліске қайтарады. ЖИ туралы заң осы тәртіппен қайта қаралған болатын.