Жоспар бойынша, жеңіл автокөліктер мен салмағы 10 тоннаға дейінгі жүк көліктерін қамтитын 2-5-кластағы көлік құралдары үшін жол ақысы 30%-ға дейін өсуі мүмкін. Ал салмағы 10 тоннадан асатын жүк көліктеріне жататын 6-7-кластағы көліктер үшін тарифтерді 50%-ға дейін арттыру көзделген.
Тарифтерді көтерудің себебі қандай?
Көлік министрлігінің түсіндіруінше, тарифтерді қайта қарау ақылы жолдарды күтіп-ұстау және пайдалану шығындарын тұрақты қаржыландыру қажеттілігімен байланысты. Сонымен қатар бұл жолдардың техникалық жағдайын нормативтік талаптарға сай сақтауға мүмкіндік береді.
Ведомство тарифтер өскеннен кейін де Қазақстандағы ақылы жолдардың құны бірқатар көрші мемлекеттердегі салыстырмалы көрсеткіштерден төмен болып қалатынын атап өткен.
Кәсіпкерлер тарифтердің өсуіне алаңдаулы
Ақылы жолдар құнының көтерілуі бизнес өкілдерінің де назарын аударды. «Атамекен» ұлттық кәсіпкерлер палатасының пікірінше, тарифтердің өсуі тек жеке автокөлік иелеріне ғана емес, жүк тасымалы, логистика және сауда салаларына да тікелей әсер етеді.
Палата өкілдері жол ақысының қымбаттауы тасымалдау шығындарын арттырып, кәсіпкерлердің қаржылық жүктемесіне әсер етуі мүмкін екенін айтады. Ал бұл өз кезегінде тауарлар мен қызметтердің түпкілікті бағасының өсуіне әкелуі ықтимал.
Осыған байланысты «Атамекен» тарифтерді қайта қарау кезінде бизнес-қоғамдастықпен ашық пікір алмасып, қабылданатын шешімдердің экономикалық салдарын жан-жақты бағалау қажет деп есептейді.
Палатаның ұстанымынша, жол инфрақұрылымын сапалы күтіп-ұстау мен отандық бизнестің бәсекеге қабілеттілігін сақтау арасында оңтайлы тепе-теңдік болуы тиіс.
«Тарифтердің өсуі экономикалық тұрғыдан негізделген, кезең-кезеңімен жүзеге асырылатын және алдын ала болжанатын болуы тиіс. Жаңа мөлшерлемелерді белгілеу кезінде көлік құралдарының класы мен сипаттамаларын, ақылы учаскелерді пайдалану қарқындылығын, сондай-ақ қосымша шығындардың көлік-логистика саласына әсерін ескеру маңызды», – делінген палата хабарламасында.
Сонымен қатар кәсіпкерлер палатасы ақылы жолдар желісін дамыту тек тарифтерді көтерумен шектелмеуі керектігін еске салды. Жиналған қаражаттың жұмсалуына ашықтықты қамтамасыз ету, жолдардың сапасын жақсарту және оларды күтіп-ұстау тиімділігін арттыру да басты назарда болуы қажет.