Мемлекет басшысы Қасым-Жомарт Тоқаев саяси көшбасшылық өзара түсіністік пен сыйластыққа негізделуі тиіс деп есептейді. Ол бұл туралы Нью-Йоркте БҰҰ Бас Ассамблеясының 80-ші сессиясында жасаған баяндамасында мәлімдеді.
Қазіргі геосаяси шиеленістер кейде кейбір көшбасшыларды өркениеттердің қақтығысы болмай қоймайды деген тұжырымға итермелейді, деп атап өтті Президент.
«Алайда, бұл бөліну – тағдыр емес, саяси таңдау. Ғылым, медицина, спорт, дін және мәдениет сияқты жаһандық қоғамдық игіліктер геосаяси бөліну мен санкцияларға айналмауы тиіс», – деді ол.
Адами қызметтің осы салалары бізді гуманизм аясында біріктіреді.
«Саяси көшбасшылар дінді және ұлттық болмысты өздерінің саяси пайдасы үшін пайдаланып, жауапсыз мәлімдемелер жасап немесе ойланбай шешім қабылдаған кезде, олар бейбітшілікке қол жеткізу жолындағы сенім мен ізгі ниетті бұзады. Сондықтан саяси көшбасшылық күдік пен тәкаппарлыққа емес, өзара түсіністік пен құрметке негізделуі тиіс», – деді Президент.
Сонымен қатар, берік бейбітшіліктің негізі – төзімділік пен даналық, құқық үстемдігіне бағытталуы тиіс, деп толықтырды ол.
Ортақ пікірталас дегеніміз не?
Жыл сайын қыркүйек айында Нью-Йорктегі БҰҰ штаб-пәтерінде мүше елдердің мемлекет және үкімет басшылары, сыртқы істер министрлері мен басқа да өкілдері жиналады. Олар әлемдік саясат, қауіпсіздік, экономика, климат және адам құқықтары сияқты маңызды мәселелер бойынша өз елдерінің ұстанымын баяндайды. Бұл – БҰҰ Бас Ассамблеясының сессиясының жалпы пікірталасы. Әдетте, әр қатысушыға 15 минут беріледі, бірақ кейде регламент бұзылуы мүмкін.