Бала елге үлгі болды, әкесі айыппұл арқалады
СҚО, Тепличное – Бірнеше күн бұрын Солтүстік Қазақстан облысы әкімдігінің жариялаған бейнеролигі әлеуметтік желілерде кеңінен тарап, елдің назарын аудартты. Видеода ауылдағы бөгетті бекіту жұмыстарына атсалысып жүрген 10 жастағы бала квадроциклмен қап тасып жүргені көрсетілген. Әкімдік бұл әрекетті патриотизм мен жанұялық бірліктің үлгісі ретінде сипаттап, Дастан есімді баланың отбасына алғыс білдірді. Алайда, бұл әрекет тек мақтауға ғана емес, заңдық тұрғыдан сынға да ілікті.
Әкімдік таратқан ресми хабарламада:
«Руслан мен Динара Мырзабай отбасын бірліктің және туған жерге деген жанашырлықтың жарқын үлгісі ретінде атап өткіміз келеді. Ұлдары Дастан да үлкендерге көмектесіп, өз квадроциклінде қап тасып, қорғаныс нысандарын күшейтуге атсалысуда. Бұл — өзгелерге үлгі боларлық іс», – делінген.
Желі қолданушыларының бір бөлігі бұл әрекетті шын жүректен жасалған азаматтық қадам деп қабылдады. «Баланың отансүйгіштігі сүйсінтеді», «Қазіргі балалардың көбі үйден шықпайды, бұл бала үлгі» деген пікірлер жиі жазылды. Алайда, қоғамның екінші бөлігі бұл әрекетті заңсыз деп бағалап, «10 жасар баланың жүргізуші куәлігі бар ма?», «Мұндай істер баланың өмірі үшін қауіпті емес пе?» деген сұрақтар қойды.
Осыған байланысты Солтүстік Қазақстан облыстық Полиция департаменті ресми түсініктеме берді. Ресми мәліметке сәйкес, оқиға 26 сәуірде Тепличное ауылында тіркелген. 34 жастағы ауыл тұрғыны, яғни Дастанның әкесі, ұлына квадроцикл жүргізуге рұқсат берген. Бұл әрекет ҚР Әкімшілік құқық бұзушылық туралы кодексінің 612-бабы 5-бөлігіне сай, көлік басқару құқығы жоқ адамға рөл беруге жатқызылады.
Нәтижесінде әкеге 50 айлық есептік көрсеткіш көлемінде — 196 600 теңге айыппұл салынды (1 АЕК — 3 932 теңге).