2025 жылдың бірінші тоқсанында қазақстандықтардың азық-түлік өнімдерін тұтыну деңгейі өткен жылмен салыстырғанда артқаны байқалды. Бұл туралы Ұлттық статистика бюросы 12 мың үй шаруашылығына жүргізілген іріктемелі зерттеу нәтижесінде хабарлады.
Зерттеу қорытындысына сәйкес, азық-түлік тұтыну көлемі барлық негізгі өнім топтары бойынша өскен. Ең көп өсім жеміс-жидек (+3,5%) пен балық және теңіз өнімдері (+2,2%) санатында тіркелді.
Орта есеппен бір адам бір айда мынадай көлемде азық-түлік тұтынған:
-
Картоп – 3,7 кг
-
1-сұрыпты бидай ұнынан жасалған нан – 2,3 кг
-
Сиыр еті – 2 кг
-
Алма – 1,6 кг
-
Құмшекер – 1,5 кг
-
Күріш – 1,3 кг
-
Шикі сүт – 0,9 литр
-
Жұмыртқа – 17,1 дана
-
Макарон өнімдері – 0,9 кг
-
Балық (жаңа ауланған немесе салқындатылған) – 0,6 кг
Өңірлік айырмашылықтар
Азық-түлік тұтыну көлемі өңірлер арасында айтарлықтай ерекшеленеді:
-
Нан және жарма өнімдері бойынша ең жоғары тұтыну Түркістан облысында тіркелген – айына жан басына шаққанда 14,1 кг, ал ең төменгі көрсеткіш – Маңғыстау облысында (7,9 кг).
-
Балық және теңіз өнімдерін ең көп тұтынатын өңір – Шығыс Қазақстан (1,7 кг), ал бұл көрсеткіш ең төмен – Шымкентте (0,5 кг).
-
Көкөніс тұтыну Түркістан облысында жоғары – 7,3 кг, ал ең аз көрсеткіш Абай облысында – 4,5 кг.
Ұлттық статистика бюросының мәліметінше, орташа жан басына шаққандағы тұтыну – белгілі бір мерзім ішінде үй шаруашылығындағы бір адамның тұтынған азық-түлік өнімдерінің нақты көлемін білдіреді. Бұл көрсеткіш үй мүшелеріне теңдей бөлінген өнім мөлшеріне негізделіп, бастапқы өнімге қайта есептеу арқылы анықталады.