Үкімет отырысында Премьер-министр Олжас Бектенов Қазақстанның көлік-транзиттік әлеуетін арттыру бойынша нақты міндеттерді атады. Оның айтуынша, транзиттік хаб ретіндегі еліміздің позициясын күшейту үшін инфрақұрылымдық мүмкіндіктерді кеңейту қажет.
– Мемлекет басшысы еліміздің көлік-логистикалық мүмкіндіктерін дамыту жөнінде нақты тапсырмалар берді. Теміржол тасымалы нарығы жыл сайын бәсекеге қабілетті бола түсуде. Осыған орай, шекара маңындағы инфрақұрылымдық «осал тұстарды» ретке келтіріп, әсіресе «Шығыс — Батыс» бағыты бойынша транзит көлемін арттыруымыз қажет, – деді Үкімет басшысы.
Олжас Бектеновтың мәлімдеуінше, биыл бірқатар ірі жобалар – «Достық — Мойынты» және «Алматы қаласының айналма жолы» іске қосылады. Сондай-ақ, «Дарбаза — Мақтаарал» және «Бақты — Аягөз» теміржол желілері салынуда. Бұл жобалар күрделі учаскелер мен түйінді тораптардың жүктемесін азайтып, транзиттік ағынды едәуір арттыруға мүмкіндік береді.
Бұдан бөлек, «Мойынты — Қызылжар», «Алтынкөл — Жетіген», «Бейнеу — Маңғыстау» теміржол желілерін салу және жаңғырту жұмыстары басталды. Жобалар еліміздің өткізу қабілетін арттыруға бағытталған.
– Барлық жұмыстар уақтылы аяқталуы тиіс. Сонымен қатар, цифрландыру – саланың басты бағыты. Автоматтандырылған басқару жүйелері, цифрлық диспетчерлеу және ақпараттық жүйелерді интеграциялау арқылы тиімділікті арттырамыз, – деді Премьер-министр.