Алматыда орналасқан Almaty
Museum of Arts музейі тіл дауының ортасында қалды. Тележурналист Азамат Әбілқайыр мекеме қызметкерлерінің қазақ тілін меңгеруге немқұрайлы қарауына наразылық білдіріп, музейге бойкот жариялады.
Журналистің айтуынша, музейге келген келушілерді өз ана тілінде қарсы алу — мәдениет пен құрметтің көрінісі. Алайда ол мекемеге барған сәтінде мұндай көзқарастың байқалмағанын атап өтті.
«Күліп кіріп, жылап шықтым. Қонақтарды басқа тілде қарсы алады, басқа тілде шығарып салады. Күніне мыңдаған турист келеді, бұл – шетелдікке күн сайын масқара болу», — деді Азамат Әбілқайыр.
Оның сөзінше, қазақша білетін жастарды жұмысқа алу жөніндегі ұсыныс та қабылданбаған.
«Қазақша білетін жастарды жұмысқа алайық десек, “ондайлар биік мәдениеттен хабары жоқ” деген жауап естідік. Сол себепті бұл музейге бойкот жариялаймын», — деді тележурналист.
Қазіргі уақытта музей өкілдері бұл жағдайға қатысты түсініктеме берген жоқ.