Қазақ тілін үйренуге арналған Steppe Rider компьютерлік ойынын әзірлеуге бюджеттен шамамен 242 миллион теңге жұмсалған. Алайда желі қолданушылары жобаны белсенді түрде сынап, ойынның сапасы мен оған деген қызығушылықтың төмен екенін алға тартты. Осыған байланысты Ғылым және жоғары білім министрлігі сынға жауап берді.
Steppe Rider жобасы 2025 жылы іске асырылып, желтоқсан айында Steam платформасында жарық көрді. Мемлекеттік сатып алу аясында жобаның жалпы құны шамамен 500 мың долларды құраған. Соған қарамастан, ойын жүктелуі аз болып, пайдаланушылар тарапынан жағымсыз пікірлер көптеп айтылды.
Брифинг барысында журналистер жобаның қаржылық тиімділігіне күмән келтіріп, сондай-ақ мәлімделген тұжырымдама мен нақты нәтиже арасындағы алшақтыққа назар аударды. Атап айтқанда, ойын қазақ тілін үйретуге арналған қадамдық RPG форматында ұсынылуы тиіс болған. Алайда іс жүзінде Steppe Rider қарапайым раннер жанрында жасалып, визуалдық әрі механикалық тұрғыдан Subway Surfers секілді танымал ойындарға ұқсас болып шыққаны айтылды.
Жобаға қатысты сынға Ғылым және жоғары білім министрлігінің Тіл саясаты комитетінің төрағасы Ербол Тілешов жауап берді. Оның айтуынша, Steppe Rider – тіл саясатын дамыту тұжырымдамасы аясында әзірленген алғашқы отандық оқыту ойыны.
«Иә, біз Steppe Rider компьютерлік ойынын жасадық. Бұл – қазақ тілін ойын арқылы оқытуға бағытталған алғашқы жобалардың бірі. Әрине, сұрақтар болды және әлі де бар», – деді комитет төрағасы.
Ербол Тілешовтің мәлімдеуінше, ойын қазақ тілін бастапқы деңгейде меңгеруге арналған. Ол A1 және A2 деңгейлеріне бағытталған және халықаралық стандарттарға сай келеді.
«Мұндай ойындардың нарықтағы құны бір платформа үшін 1 мың доллардан 300 мың долларға дейін жетуі мүмкін. Ал Steppe Rider үш платформаны қамтиды», – деді ол.
Министрлік өкілі жобаның әлі де жетілдірілетінін атап өтті. Оның айтуынша, ойын 2026 жылы жаңартылып, функционалы мен мазмұны кеңейтіледі.
«Бұл – болашағы бар жоба. Қазірдің өзінде пікірлердің басым бөлігі оң. Ойын кең аудиторияға, соның ішінде балаларға арналған және мемлекеттік тілді ойын арқылы насихаттаудың тиімді құралы бола алады», – деді Ербол Тілешов.
Оның сөзінше, Steppe Rider кең таралған ойын форматына негізделген және қазақ тілінің беделін арттыруға мүмкіндік береді. Министрлік ойынды тұрақты түрде жаңартып отыру арқылы мыңдаған, тіпті ондаған мың пайдаланушыны қамтуды көздеп отыр.