Қазақстан Президенті Қасым-Жомарт Тоқаев Вашингтон қаласына жұмыс сапарымен барды. Бұл туралы Ақорданың баспасөз қызметі 19 ақпанда хабарлады.
Сапар аясында Мемлекет басшысы Бейбітшілік кеңесінің алғашқы отырысына қатысып, бірқатар ел көшбасшыларымен және АҚШ-тың ресми тұлғаларымен кездесулер өткізеді.
Бұған дейін 18–19 ақпан күндері Қасым-Жомарт Тоқаевтың Дональд Трамптың шақыруымен аталған кеңестің алғашқы отырысына қатысу үшін Вашингтонға жұмыс сапарымен баратыны хабарланған болатын.
Саммит барысында Газа секторындағы ахуалды тұрақтандыру мәселесіне ерекше назар аударылады. Атап айтқанда, бейбітшілікті нығайту, қауіпсіздікті қамтамасыз ету және гуманитарлық көмекті жеткізу бойынша нақты шараларды әзірлеу жоспарланып отыр.
Сонымен қатар, сапар шеңберінде Мемлекет басшысы америкалық ірі компаниялардың жетекшілерімен бірқатар кездесулер өткізеді.