Қазақстанда мал шаруашылығы агроөнеркәсіптік кешеннің басым бағыты саналғанымен, салада жүйелі мәселелер әлі де шешімін таппай отыр. Бұл туралы Сенаттың Аграрлық мәселелер жөніндегі комитет отырысында сенатор Арман Өтеғұлов мәлімдеді. Оның айтуынша, мал басы саны артқанымен, өнімділік төмен, жайылым тозып, кадр тапшылығы сақталуда.
Сенатор ресми деректердің бір-біріне сәйкес келмейтініне назар аударды. 2024 жылы Мемлекет басшысы елде 2 млн ірі қара мен 3 млн-нан астам уақ малдың санатқа енгізілмегенін айтқан болатын. Осыған байланысты 2025 жылы ауыл шаруашылығы санағы жүргізілгенімен, оның нәтижелері әлі жарияланбаған. Қазірдің өзінде министрлік пен статистика деректері арасында айырмашылық бар, ал өңірлердегі мәліметтер мүлде бөлек. Мұндай жағдайда субсидия мен жеңілдетілген несие бөлу қиынға соғады, деді сенатор.
Арман Өтеғұлов мал саны көбейгенімен, бір бас малдан алынатын өнім көлемі азайғанын атап өтті. 1990 жылдары тірі салмақта өндірілген ет 2,6 млн тонна болса, 2024 жылы бұл көрсеткіш 1,9 млн тоннаға дейін төмендеген. Сол сияқты сүт пен тері өндірісі де айтарлықтай қысқарған. Бұл өнімділіктің төмендеп, импортқа тәуелділіктің жоғары екенін көрсетеді.
Сондай-ақ сенатор тірі мал өндірісі мен ет өңдеу саласы арасындағы байланыстың әлсіздігін сынға алды. Малдың бордақылауға жеткізілмеуі, бордақылау алаңдарының жеткіліксіздігі және қаржыландыру тетіктерінің тиімсіздігі салдарынан өңдеу кәсіпорындары өз қуатының тек 50–60 пайызы деңгейінде ғана жұмыс істеп отыр. Кей өңірлерде шикізат тапшылығына байланысты мал шетелден әкелінуде. Бұл саладағы үйлесімсіздіктің айқын көрінісі екенін атап өтті сенатор.