Орталық сайлау комиссиясы мәслихат депутаттығына кандидаттардың сайлау науқанына республикалық бюджеттен бөлінетін қаражат көлемін жариялады.
Комиссия қаулысына сәйкес, кандидаттардың сайлауалды үгіт-насихат жұмыстарына, жария іс-шаралар өткізуге және көлік шығындарына жұмсалатын қаражаты мәслихат деңгейіне қарай белгіленген.
Астана, облыстар және республикалық маңызы бар қалалар мәслихаттарының депутаттығына кандидаттарға:
- Теледидар мен радио арқылы сайлауалды бағдарламаны таныстыруға, сондай-ақ мерзімді баспасөзде немесе желілік басылымдарда екі мақала жариялауға – 410 000 теңге;
- Сайлауалды жария іс-шараларын өткізуге және үгіт материалдарын дайындауға – 180 000 теңге;
- Көлік шығындарына – 110 000 теңге бөлінеді.
Қалалық мәслихат депутаттығына кандидаттарға:
- Сайлауалды бағдарламаны теледидар мен радио арқылы таныстыруға және баспасөзде немесе желілік басылымдарда екі мақала жариялауға – 400 000 теңге;
- Сайлауалды жария іс-шараларын өткізуге және үгіт материалдарын шығаруға – 170 000 теңге;
- Көлік шығындарына – 80 000 теңге қарастырылған.
Аудандық мәслихат депутаттығына кандидаттарға:
- Сайлауалды бағдарламаны теледидар мен радио арқылы таныстыруға және баспасөзде немесе желілік басылымдарда екі мақала жариялауға – 290 000 теңге;
- Сайлауалды жария іс-шараларын өткізуге және үгіт материалдарын шығаруға – 130 000 теңге;
- Көлік шығындарына – 80 000 теңге бөлінеді.
Айта кетейік, мәслихат депутаттарының сайлауы биыл 29 қарашада өтеді.