Алматы облысының Талғар ауданында адам өлтіру мен баланы ұрлау оқиғасына байланысты учаскелік инспекторға қатысты қылмыстық іс қозғалды. Құқық қорғау органы қызметкері өз әрекеттерімен қайғылы жағдайдың туындауына жол берген деген айып тағылуда. Прокуратураның мәліметінше, инспекторға ҚР Қылмыстық кодексінің екі бабы — абайсызда ауыр зардаптарға әкеп соққан салғырттық және қызметтік жалғандық жасау — бойынша айып тағылған. Тергеу аяқталып, ол ішкі істер органдарынан 2025 жылдың 4 қарашасында, оқиғадан екі айдан аса уақыт өткен соң, жұмыстан босатылған.
Жәбірленуші отбасының адвокаты Жандос Палманов инспектор трагедиядан үш күн бұрын шақырту бойынша әйелдің үйіне барғанын айтады. Сол күні үйге қолында қаруы бар ер адам да келген. Адвокаттың айтуынша, инспектор қорғау нұсқамасын рәсімдеп, оған жәбірленушінің атынан жалған қолтаңба қойған. Сараптама бұл қолтаңбаның әйелге тиесілі емес екенін растаған.
Ал 6 қыркүйекте сол ер адам әйелдің ағасын мылтықпен атып өлтіріп, екі сыбайласымен бірге оның екі жасар қызын ұрлап кеткен. Арнайы жасақ жүргізген операция барысында бала аман-есен табылып, анасына қайтарылған. Күдікті қолға түсіп, қазіргі уақытта қамауда отыр. Іс материалдары прокурордың қарауына ұсынылып, процессуалдық шешім сотта қабылданатын болады.