Тоқаев цифрландыру, дербес деректерді қорғау, жол қозғалысы және көліктегі озық технологияларды реттеу мәселелері бойынша өзгерістер мен толықтырулар енгізу туралы заңға қол қойды. Құжатта электрмобильдер үшін арнайы мемлекеттік тіркеу нөмірлік белгілерін енгізу қарастырылған.
Жаңа нөмірлердің нақты дизайны мен түсі заңда көрсетілмеген. Оларды Ішкі істер министрлігі қосымша нормативтік-құқықтық актілер арқылы бекітеді. Бұған дейін ведомство халықаралық тәжірибеге сүйене отырып, электрмобильдерге арналған нөмірлердің жасыл түсті болуы мүмкін екенін хабарлаған. Мұндай тәжірибе Қытай, Норвегия, Канада, Польша және Беларусь елдерінде қолданылады.
Арнайы нөмірлер электрмобильдерді жол камералары мен автоматтандырылған жүйелер арқылы оңай анықтауға мүмкіндік береді. Бұл тегін тұрақ, зарядтау орындарын пайдалану және ерекше қорғалатын табиғи аумақтарға кіру сияқты жеңілдіктерді автоматты түрде ұсынуды жеңілдетеді.
Ішкі істер министрлігінің мәліметінше, заң күшіне енгеннен кейін жаңа нөмірлерді беру жүйесін іске қосуға шамамен алты ай қажет болады. Ұлттық статистика бюросының дерегіне сәйкес, 2026 жылғы мамыр айының басында Қазақстанда 24 мыңнан астам электрмобиль тіркелген.
Сонымен қатар заңнамаға «ұшқышсыз көлік құралы», «ұшқышсыз көлік жүйесі», «ұшқышсыз көлік құралдарын пайдалану аймағы» және «қашықтан оператор» ұғымдары енгізілді. Қашықтан оператор қажет болған жағдайда көлікті басқаруды өз қолына ала алады. Сондай-ақ «Теміржол көлігі туралы» заңда жүргізушісіз теміржол көлігінің анықтамасы бекітілді.
Авиация саласында озық әуе мобильдігі, қалалық әуе мобильдігі, вертипорт және әуе такси операторларына қатысты жаңа нормалар енгізілді. Ұшқышсыз әуе қозғалысына қызмет көрсету саласында шетелдік заңды тұлғалар мен шетелдік қатысуы бар компаниялардың қызметіне тыйым салынып, бұл құқық тек қазақстандық ұйымдарға берілді.
Жаңа заңға сәйкес, қозғалтқышы бар велосипедтер мопедтермен теңестіріледі. Енді олар мемлекеттік тіркеуден өтіп, нөмірлік белгі алуы тиіс. Мұндай көлік құралдарының жүргізушілеріне мопедтерге арналған талаптар қолданылады. Атап айтқанда, веложолдармен, веложолақтармен, тротуарлармен және жаяу жүргіншілер жолдарымен жүруге рұқсат етілмейді.
Сонымен қатар гироскутерлер, сигвейлер, монодөңгелектер және электрлі моторлы скейтбордтар сияқты шағын электр көлік құралдары үшін веложолдармен жүру құқығы сақталады. Алайда оларға жолдың жүріс бөлігіне шығуға тыйым салынады.