Астананың қылмыстық істер жөніндегі ауданаралық соты бұрынғы мәдениет және спорт вице-министрі Ерлан Қожағапанов пен SUCCESS K агенттігінің бас директоры Ләззат Көккөзоваға қатысты үкім шығарды. Олар 1 миллиард теңге бюджет қаражатын жымқыру ісі бойынша сотқа тартылған.
Қожағапанов қызметтік өкілеттігін асыра пайдаланды деп танылып, 3 жылға бас бостандығынан айырылды. Сондай-ақ оған осы мерзім ішінде басшылық қызмет атқаруға және мемлекеттік наградаларды иеленуге тыйым салынды.
Көккөзова сеніп тапсырылған қаржыны жымқырғаны үшін 5 жылға бас бостандығынан айырылды және 7 жыл бойы басқарушылық қызметтерден шеттетілді.
Айыптаушы тарап Қожағапановқа 7 жыл, Көккөзоваға 8 жыл жаза сұраған. Алайда сот жеңілдететін мән-жайларды ескеріп, жазаны жұмсартты.