Солтүстік Қазақстан облысының Тайынша ауданына қарасты Ильичевка ауылындағы «Тайынша май» ЖШС-не тиесілі агроөнеркәсіптік кәсіпорында ірі жарылыс болды. Кәсіпорын Қытайдың «Айцзюй» корпорациясына қарайды. Жарылыс сәті жергілікті тұрғындардың бірімен видеоға түсірілген.
Оқиғаның алдын ала себебі – жанармай құю шлангісінің үзілуі. Соның салдарынан кәсіпорын аумағындағы екі жинағышта жану мен жарылыс болып, кейін Volvo маркалы газ тасымалдаушы көлік өртенген.
СҚО полиция департаментінің хабарлауынша, жарылыс нәтижесінде тоғыз адам зардап шеккен. Олардың сегізі түрлі дәрежедегі күйік пен жарақатпен ауруханаға жеткізілді. Зардап шеккендер арасында газ жеткізуші Көкшетау қаласының тұрғындары және көмекке келген құтқарушылар да бар.
Төтенше жағдайлар министрлігінің мәліметінше, өрт 50 шаршы метр аумақта таралып, құтқарушылардың жедел әрі кәсіби әрекеттерінің арқасында сағат 20:57-де толық сөндірілген.
«Тайынша май» ЖШС – май және тоң май өндірумен айналысатын кәсіпорын. Ол Қытайдың «Айцзюй» халықаралық корпорациясына тиесілі. Компания агроөнеркәсіп, халықаралық логистика салаларына маманданған. «Айцзюй» корпорациясының негізгі логистикалық орталығы Қытайдың Сиань қаласындағы құрғақ портта орналасқан. Бұл жерден Қазақстан, Орталық Азия және Еуропа елдеріне май, ұн және өзге де тауарлар теміржол арқылы жөнелтіледі.