Күдіктілер өздерін зергерлік бұйым саудасымен айналысатын компания ретінде таныстырып, салымшыларға 5 ай ішінде салынған қаражаттың 40–60 пайызы көлемінде ай сайын табыс түсетінін уәде еткен. Сонымен қатар негізгі салымдардың сақталуына кепілдік берілетіні айтылған.
Алайда, нақты төлемдер компания қызметінен немесе тауар сатудан емес, кейінгі қатысушылардың салымдары есебінен жүзеге асырылған. Осылайша, қаржы пирамидасына 200-ден астам адам тартылып, 400 миллион теңгеден астам қаражат салынған.
Сонымен қатар күдіктілер өздерінің туыстарын «дроп» ретінде пайдаланып, олардың банк карталары арқылы басқа қатысушылардан түскен ақшаны қолма-қол шешіп отырған.
Агенттіктің мәліметінше, қаржы пирамидасын ұйымдастырған азамат қамауға алынды.
– Қазіргі уақытта оған тиесілі автокөлік пен тұрғын үйге шектеу қойылды. Қылмыстық-процестік кодекстің 201-бабына сәйкес, тергеу мүддесіне байланысты өзге ақпарат жариялауға жатпайды, – делінген ресми хабарламада.