Әзірбайжандағы ірі оқу орны орыс және ағылшын тілдерінен бас тартты
2025–2026 оқу жылында Қарабақ университеті шетел тілдерінде білім беретін бөлімдерін жабатынын мәлімдеді. Енді бұл оқу орнында студенттер орыс немесе ағылшын тілдерінде білім ала алмайды.
«Бізге бұл мәселеге қатысты көптеген сауалдар келіп түсті. 2025–2026 оқу жылында Қарабақ университетінде студенттерді ағылшын және орыс тілдерінде оқытатын бөлімдерге қабылдау қарастырылмағанын хабарлаймыз», – делінген университеттің ресми мәлімдемесінде.
Айта кетейік, соңғы уақытта Әзербайжан мен Ресей арасындағы қарым-қатынас салқындай түскен. Әсіресе, AZAL әуе компаниясының ұшағы құлағаннан кейін Баку мен Мәскеу арасындағы байланыс күрделене түскен еді.