Денсаулық сақтау министрлігі сотталғандарды ауруына байланысты жазадан босату тәртібіне өзгерістер енгізуді ұсынды
Денсаулық сақтау министрлігі жазасын өтеуден босатуға ұсынылған сотталғандарды медициналық куәландыру қағидалары мен жазадан босатуға негіз болатын аурулар тізіміне өзгерістер енгізу жөніндегі бұйрық жобасын дайындады.
Жаңа жобада:
-
ауруына байланысты жазасын өтеуден босатуға ұсынылатын сотталғандарды медициналық куәландырудан өткізу тәртібі;
-
босатуға негіз болатын аурулар тізбесі қайта қаралып, нақтыланды.
Бұл бастаманың мақсаты — ауыр науқас сотталғандардың денсаулығын сақтау және өлім-жітім көрсеткішін төмендету.
Негізгі өзгерістер мыналарды қамтиды:
-
Бауыр циррозының кеңейтілген түрлері тізімге енгізілді;
-
Созылмалы бүйрек ауруының сатылары нақты көрсетілді;
-
Ауыр дәрежедегі гормонға тәуелді созылмалы обструктивті өкпе ауруы тізімге қосылды.
Сонымен қатар арнайы медициналық комиссияның рөлі күшейтілді. Комиссияның міндеттері, функциялары, жұмыс қағидаттары және құрамы нақты бекітілген.
Сотталған адамның денсаулық жағдайы нашарлаған жағдайда, оны қайта медициналық куәландыру мүмкіндігі қарастырылған.
Аталған бұйрық жобасы 2025 жылғы 5 қыркүйекке дейін «Ашық НҚА» порталында жария талқылауға ұсынылған.