Премьер-министр Олжас Бектенов мұнай өнімдерінің басқа елдерге заңсыз өтіп кетуіне жол бермеу үшін қатаң бақылау жүргізуді тапсырды. Бұған дейін Қазақстанда жанар-жағармай материалдарының бағасына мораторий енгізілген болатын.
“Қазіргі кезде көршілес елдермен баға айырмашылығы күшейіп келеді. Біздің бензин мен дизель көршілерге қарағанда әлдеқайда арзан. Сондықтан энергетика, сауда, қаржы, ішкі істер министрліктері, қаржылық мониторинг агенттігі және ұлттық қауіпсіздік комитетінің шекара қызметі отын балансына және заңсыз экспортқа қатаң бақылау жасауы қажет”, — деді Бектенов үкіметтің отырысында.
Айта кетейік, бүгін министрлер кабинеті халықтың әл-ауқатын арттыру жөніндегі 2026–2028 жылдарға арналған бірлескен іс-қимыл бағдарламасын қабылдау үшін жиналды.